काठमाडौं उपत्यकाको फोहोर मैला व्यवस्थापन गर्ने कुरा सानो कुरा होइन : हितबहादुर तामाङ



काठमाडौं । नुवाकोटका जनप्रतिनिधि र सरोकारवालाले काठमाडौंको फोहोरमैलाको दिर्घकालिन व्यवस्थापन गर्नको लागि अपिल गरेका छन् । उनीहरुले राज्यले दिर्घकालिन नीति अपनाएर उक्त समस्याको समाधान गर्नुपर्नेमा जोड दिएका हुन् । हिजो भएको सहमतिले दिर्घकालिन समाधान नगर्ने भन्दै उनीहरुले चिन्तासमेत व्यक्त गरेका छन् ।

आइतबार रिपोर्टर्स क्लब नेपालले आयोजना गरेको साक्षात्कारमा बोल्दै नेकपा (माओवादी केन्द्र) का नेता तथा सांसद हितबहादुर तामाङले काठमाडौं उपत्यकाका ४० लाखलाई प्रभावित पार्ने फोहोर मैलाको व्यवस्थापन गर्ने कुरा सानो कुरा नभएको स्पष्ट पारेका छन् । उनले सरकार र सिस्डोल बञ्चरे डाँडा फोहोरमैला व्यवस्थापन सरोकार समितिबीच भएको सहमति सकारात्मक भएपनि उक्त सहमति आंशिक मात्रै भएको प्रतिक्रिया दिए ।

फोहोरमैला व्यवस्थापन गर्न दिईएवापत स्थानीयले राज्यबाट पर्याप्त राहतसमेत नपाएको उनको गुनासो छ । फोहोरको दुर्गन्धबाट स्थानीयहरुमा रोगसमेत लाग्ने गरेको उनको भनाई छ । समस्याको दिर्घकालिन समाधानको लागि ठोस कदम चाल्नुपर्ने तामाङको भनाई छ । उनले त्यसको लागि विज्ञ सम्मिलित टोली गठन गर्नुपर्नेपनि सुझाए । उनले भने,‘त्यहाँ स्थानीय विकाससम्बन्धी अन्य थुप्रै खालका समस्याहरु छन् ।’

तत्कालका लागि काठमाडौं महानगरपालिकाले गर्नुपर्ने दायित्व वहन पनि गर्नुपर्ने उनले सुनाए । उनले अहिले सबै समस्या समाधान वा हल भईनसकेको पनि जिकिर गरे । उनले हालै भएको सहमति र विगतका सम्झौताहरु अक्षरंश पालना हुने विश्वास दिलाए ।

प्रतिक्रिया दिनुहोस्